شد الحزام على بطنك
وارحم دموع العين
إمسك رغيف العيش
وإقسمه نصين
طيَّر حمام عقلك
لا بُرج ولا بُرجين
لا العقل بقا نافع
ولا الكلام باللِّين
هتعيش هنا بالمُر
بالأمر أو الإتنين
شد الحزام ع البطن
واربط معاه حجرين
الجوع دا كان كافر
دلوقتي بقا م الدين
والدين بقا لعبه
في إيدين شيوخ سلاطين
بيجَمّلو في الزهد
لاجل عيون الاسياد
والعدل والمساواة
سَقطو في كل خطاب
شد الحزام كَسَّر ..
جميع ضلوع الجسم
شِيل ضلع ولا اتنين
افتح بيبان للسجن
ايه ذنبها العصافير تموت جياع في البطن ؟!
إحنا بلاد المجد
الاهرامات والنيل
القمح ع الشطين
طالع يقول تأويل
الخير في هذي الأرض
باقي ليوم الدين
المشكلة والحل
في ابن الهرم والنيل
يظبط ميزان العدل
دا كلنا من طين
في ناس بتاكل شهد
وناس بتاكل طين
وناس يفيض الأكل
يكفي بطون جعانين
شد الحزام ع البطن
واستنى يوم الدين
هناك تلاقي العدل
كل البشر ظالمين
#شاعر_محمد_بسيم
#محافظة_الجيزة
#مبادرة_سُفراء_الكتابة_لدعم_المواهب